A Asociación de Colleiteiros e Embotelladores do Ribeiro defende un modelo para a Denominación de Orixe baseado na diferenciación a través da tipicidade, a excelencia e a recuperación da esencia histórica do Ribeiro. Este modelo, aprobado en asemblea e remitido ao Consello Regulador, busca devolverlle ao viño do Ribeiro o seu verdadeiro carácter, construído sobre séculos de tradición, saber e respecto pola terra.

O noso obxectivo é reposicionar a marca Ribeiro como referente de calidade e autenticidade, establecendo unha clasificación dos viños segundo a súa orixe e garantindo que todos eles manteñan a súa identidade galega. Defendemos un sistema que recoñeza o traballo do colleiteiro, elaborado con 100% de variedades autóctonas. Apostamos, ademais, por unha viticultura responsable e coherente co territorio, propoñendo a reconversión das viñas de variedades foráneas e rexeitando a ampliación dos límites da denominación mentres existan terras produtivas abandonadas.

A nosa filosofía é sinxela e firme: calidade e orixe en cada botella. Somos pequenas adegas que traballan as súas propias viñas e elaboran o seu propio viño, mantendo vivo un xeito de facer que se transmite de xeración en xeración. Cada colleiteiro é gardián dun patrimonio vitícola e cultural que forma parte da identidade de Galicia.

Cremos que o futuro do Ribeiro pasa por un modelo de valor, non de volume: pola diferenciación, pola excelencia e polo respecto á nosa esencia. Reivindicamos a modernización das denominacións galegas, o liderado no mercado dos tintos autóctonos e a aposta decidida polo enoturismo de calidade, capaz de converter O Ribeiro nun destino singular e sostible, onde o viño se viva como cultura e emoción.

Nos últimos sesenta anos perdeuse o 85% da superficie de viñedo, e con ela unha parte importante da nosa identidade. Na Asociación estamos convencidos de que o futuro pasa por volver mirar á terra e ás castes autóctonas.

Queremos garantir a supervivencia e a prosperidade dun territorio vitivinícola único, para que o Ribeiro siga falando da súa terra con forza, coa voz limpa e auténtica do viño galego.

Colleiteiros asociados

• ADEGA JOSÉ ESTÉVEZ S.L.
• ADEGA MANUEL ROJO S.L.
• ADEGAS CELME, S.L.
• ADEGA POUSADOIRO
• ADEGAS RAÍCES GALEGAS S.L.
• CUÑAS DAVIA
• ANTONIO CAJIDE GULÍN – SAMEIRÁS
• ANTONIO GIRALDEZ ARIAS
• ANTONIO MIGUEZ AMIL – Boas Vides
• ARCO DA VELLA ADEGA DE ELADIO S.L.
• BERNARDO ESTÉVEZ VILLAR
• BODEGAS GÓMEZ SANMARTIN S.L.
• BODEGAS VAL DE SOUTO S.L.
• COLLEITEIRO MANUEL PENEDO S.C. – GANDARELA
• DIEGO DONIZ DIEGUEZ – Tear dos Dodi
• FERNANDO CIBERA ESTEVEZ
• HÉCTOR PÉREZ. MICROPARAXES
• JAVIER ESTEVEZ ABELEDO
• JOAQUÍN VÁZQUEZ MARTÍNEZ
• JOSE MERENS MARTÍNEZ – LAGAR DO MERENS
• JOSE VARELA AGUADO – CATRO FERRADOS
• JULIA MAR BANDE PIVIDA – SON DE ARRIEIRO
• LAZARO MORENO SOTELO – LAUDES
• MONTE DO SUIDO – EULOGIO COLLARTE
• JUAN CARLOS VILLAR BLANCO